PAGHIHIGANTI ANG MOTIBO? Tatlong miyembro ng pamilya brutal na pinatay sa loob ng sariling tahanan

Isang karumal-dumal na krimen ang yumanig sa Barangay Managok, Malaybalay City, Bukidnon noong gabi ng Mayo 21, 2025, matapos matagpuang walang buhay at halos hindi na makilala ang tatlong miyembro ng pamilyang Andohon.

Ang mga biktima ay sina Jovany Andohon, 50, ang kanyang asawang si Evangeline, 48, at ang kanilang 14-anyos na anak. Ayon sa inisyal na ulat mula sa Juander Radyo Malaybalay, sila ay pinaslang at binugbog gamit ang tubo sa loob ng kanilang tahanan bandang alas-11 ng gabi.

Sa kabila ng karahasan, nakaligtas ang dalawang batang babae na edad 8 at 10. Ayon sa imbestigasyon, sila ay nakatakas sa pamamagitan ng pagtatago sa ilalim ng mga damit at plywood, dahilan kung bakit hindi sila natagpuan ng salarin. Kinabukasan, bandang alas-7 ng umaga, lumabas sila ng bahay at humingi ng tulong sa mga kapitbahay, na agad namang nag-ulat sa Malaybalay City Police Station.