MATAGAL NG PINAKITA PALA? Rudy Baldwin, nahulaan lindol sa Cebu? 'Taong 2021 pa ito pinakita sa akin!'

Marami sa mga netizen ang nangilabot nang balikan ang matagal nang prediksyon ng fortune teller na Rudy Baldwin, na magkakaroon ng malakas na paglindol sa Cebu.

Martes ng gabi, Setyembre 30, ayon sa inisyal na ulat ng Philippine Institute of Volcanology and Seismology (Phivolcs), niyanig ng magnitude 6.7 ang Bogo City sa Cebu, na nagdulot ng pagkasira ng mga imprastraktura at casualties sa nabanggit na lungsod, gayundin sa mga karatig-lugar. Kalaunan, itinaas nila sa magnitude 6.9 ang naitalang lakas ng nabanggit na pagyanig.

Miyerkules ng umaga, Oktubre 1, dito na tumambad ang iba't ibang mga sitwasyon ng mga ari-ariang nawasak at buhay na nawala, na aftermath ng nabanggit na lindol.

Kaya naman, sa tuwing nagkakaroon ng mga matinding pangyayari sa bansa at mundo, kagaya na lamang ng mga kalamidad, agad na binabalikan ng mga netizen ang mga inilabas na prediksyon noon ni Rudy.

Ilan nga sa mga netizen ang nangilabot dahil tila nagkatotoo raw ang naging hula noon ng fortune teller na magkakaroon ng malalang lindol sa Cebu.

Ibinahagi pa ng mga netizen ang screenshots ng kaniyang Facebook post bilang "resibo."

Naka-highlight pa ang bahaging dahil sa malakas na lindol, mapipinsala ang isang simbahan.